放題抗爭

(呢排成日有朋友同我講返工返學好唔開心，所以今次想輕輕鬆鬆寫下on9野希望tum下佢地開心。)

Grad完叫做返左兩個月工，但已經返到個人謝哂，日日留係office，個人生好似變得好短暫咁—除左返工放工迫地鐵，就只係淨返訓教。係香港呢個地方，其實你日日做野做到肉體上同精神上都咁攰，一有時間你都無幾多娛樂可以揀。

你諗下，攰到嘔咁返左五日工，又開左咁多日OT，唔通星期六日仲有力去行山去接觸大自然咩，去接觸樓下間7仔都無力啦。唔係講笑，你叫我係地鐵站行層樓梯上地面都多謝哂，已經係個日最大運動量架啦，比起大學玩danso一日練九個鐘舞既生活真係完全兩個世界。唔好意思，畢左業開始，做運動已經唔再俾我count做娛樂，頂多叫鍛練身體，就好似返學增值自己咁，一星期做一次咁樣樣。另外畫下畫，同玩下音樂，而呢d我已經浮誇到分類為夢想。咁所以，除左返工、做下運動、追下夢，我只能夠當食同訓係人生最大既娛樂。

由於訓教係無咩策略好分享，所以我直接入正題講食嗰方面。我自從開始左返fulltime，正如黃子華話齋，錢係愈黎愈唔夠洗既，好大程度上係因為以前唔多洗自己搵既關係啦。於是我比起讀書時候就更加慳，而講到慳得黎反而有賺既就不得不提：一個月至少食返一次放題係我非常重要既agenda。

點解？基於我傳承左香港人一向食buffet既嗰個格，令我覺得食放題非常痛快，抵過哂唱k、shopping同入戲院睇戲。我最鐘意就係食個d又高汁又百幾蚊就ko到既放題，而我想分享一下其中一間我成日食既打邊爐放題（唔開名啦）。首先，我會係週末訓到安樂醒，唔食早餐，慢慢hea到兩點就出去商場到拎飛等入座。食午市有住無限咁多既著數，一黎少人d唔需要等太耐，二黎平一大截，三黎就係⋯大佬啊，我由琴晚至依加足足連續差不多廿個鐘無食過野，我既戰鬥力係呢個時段可以話係最高。（除非你早餐午餐下午茶都唔食等晚市，但我就唔得啦哈哈。）

跟住呢，當然就係食既嗰90分鐘點安排啦，呢d好講求效率架。入到去之後，我第一步係會係枱上準備好所有食物先，拎定哂d會打邊爐既配料，同拎一碗沙津，同野飲，同牛肉炒飯。咁個waiter未拎牛豬雞黎，你咪食住沙津同炒飯先，同時當水滾就放d蘿蔔啊金菇啊落去get ready。之後肉黎到咪正式開始囉，食返幾round，中途熱咪食多碗沙津冷靜下，或者去下toilet兜返轉。另外我係坐唔定架，因為我要不停出去拎野食，一次拎少少，保持返一定既運動量有助你既消化系統。

最後亦係最重要既野，就係你必須揀一個作戰能力同你不相上下既同伴去食。如果你揀個死港女，食少少就停哂手，你仲邊有團火繼續啊？一個同你出生入死既戰友會令你食得不亦樂乎，你地會係每清走一碟牛既時候，交換一個沾沾自喜既眼神，然後自我感覺良好。你地會諗，嘿，我地咁食法到底係食凸左幾多呢？況且多一個人一齊砌，總好過毒L自己食自己肥。事後又多一條友陪我去跑步，所以話，揀邊個同你去放題真係超越左齋食既個一下，而係整個精神上合作既過程。

你可能會話，唉食得咁辛苦為乜，求鬼其咪算囉。但你明唔明，呢種小事對某d人黎講已經係成長中僅存既叛逆。當你被迫去建設呢個社會，同時又被呢個社會不停咁建設切左你，生活上其實可以唔跟規矩做既事、可以有得發揮既空間已經愈黎愈少。除左得閒去食下放題自我感覺好似至少有一次、只係一次咁多叫做掌握到人生，賺返一直壓住我地頭上操控住整個市場咁耐既個堆有錢佬之外，其實都無咩可以做到，而我都知呢d掙扎好微不足道。自以為食到餐飯可以拎返丁點自尊、寫到篇文章叫有幾個人睇、做到幾樣社會認為無價值既事，而到頭來，其實我地都只係呢座大型機器中既一粒齒輪。

不過，苦中作樂亦未嘗不可。共勉之。