瑞典鬼仔問香港點： 我唔介意解釋一萬次 我怕以後冇得再解釋
Hello，今日突然想打呢篇文，會用口語係因為想打快D同直接D。雖然可能睇既人唔會好多，但只要我身邊有一個朋友會睇我都覺得好值得。事先聲明，好對唔住，我想講既野未完全組織得好好，但我會盡力表達。
兩年前，我一個人歐遊既時候因為太窮，所以成日去couchsurfing，即係沙發衝浪，原理大概係你兩手空空去一個陌生人屋企，訓人地Sofa，當中冇錢銀交易，只為左識新朋友同唔洗瞓街。 我個陣係瑞典Stockholm就係用呢種模式借宿左三晚，我個host係一個土生土長既瑞典男仔，叫Andre，大我四五歲，出左黎做野兩年，自己住，金色頭髮加藍眼睛，好正。佢話因為自己讀大學個陣去過一年美國exchange，所以一路都好掛住去旅行既感覺，但又因為要返工無得周圍走，於是就想透過做host去識多d唔同國家既surfer。
咁我地第二晚就去左downtown食好出名既瑞典肉丸，姐係IKEA既本地版，好貴，同個味都好唔同，但呢d後話啦。之後，我地就無無聊聊咁周圍行下，傾左成晚旅行啊讀書啊影相啊個d最後又殺出一句：「Is Hong Kong China? 」其實當時我真係政治極冷感，真係冷感過所有港豬既港豬，最大既志願係移民，邊到都好（除左大6），總之唔想留係香港。不過個條問題無論邊個問，我都一lun定同佢講得好清楚：「No！」然後再解釋十五分鐘，差不多就好似Auman個段片1既講法咁。然後Andre又問：「What's the biggest challenge now?」講真，我個時真係對政治幾乎一無所知，況且係芬蘭stay左半年日日hey lets party真係乜都脫哂節，連用廣東話爆句粗都窒機，唔係講笑。不過我記得我同佢講：「I THINK Hong Kong is breaking apart。」 其實我都唔想識少少扮代表，但我個下終於明白你出得去exchange你真係已經順理成章變成左香港既代表，無論你想定唔想，有資格定無資格。對唔住，我覺醒得遲，個陣只能用我有既認知去解釋我既觀點，講完一輪灰哂機，所以就隨口問下:「How about in Stockholm? What’s the problem lately?」
佢比左一個最精彩既答案，我一世都記得。Andre指一指旁邊，話：「Oh... We are now arguing which COLOUR to use when we repaint this historical building。」
我呆左，真係呆左一分鐘。個幢應該係一幢歷史建築，類似parliament d frd，Andre話佢地掙扎緊要用米黃色定淺粉紅色（好似係呢兩個options，唉，是旦啦），又話邊隻色代表緊d咩價值，又話老一輩想要咩色，後生一輩想要咩色，嘈左好耐...... Er，其實之後佢講個d我乜都聽唔入耳，因為，喂，大佬啊，我地香港連特首都唔到我地揀，而你地連幢唔知乜鬼野既外牆油咩色都有得揀？！什麼玩法...... 當時我除左羨慕，都係羨慕，點解可以差咁遠。
每一次出國都會有好多人問我「Is Hong Kong China？」，由我13歲問到依家，我每一次都會好認真咁答。一開始係為左面子，為左劃清界線，為左唔想人地當我係大6人；之後唔單止為左一啖氣，更重要既係講事實，講香港同大陸有咩唔同，講呢個moment面對緊D乜，想世界關注我地，想其他國家既人知道香港發生緊咩事。 係歐洲，小至學生佔領大學抗議，大至人民公投否決政府派錢，都可以好理所當然咁發生。係歐洲，基本上你唔會揾到一個唔願意傾政治既人，我同所有熟既歐洲朋友通通都傾過，上年係德國Carpooling既時候甚至試過同個本身唔識既司機傾政治傾左6個鐘，non－stop。係歐洲，我同識既朋友一傾到社會時事全部唔會同我講「I don’t know」，個個有一套自己既睇法，而且好想了解多D周圍發生緊咩事。我有兩個以前係芬蘭識既同學，一個來自荷蘭，一個來自立陶宛，我們每隔幾個月就會黎一次視象會議（姐係Skype啦），每次一定傾到政治，我個frd直頭講到明： 傾愛情同政治都係同等重要既必傾Agenda。果陣佔中好多歐洲朋友一睇到新聞都Whatsapp問我情況，我敢講反應仲快過我大把香港朋友。
我覺得歐洲既大部份人都好高質，肯用腦，識思考，有個氣場比我覺得佢地值得擁有自由。人地幸福，乜都有得揀，唔係天跌落黎，唔係你唔關心社會既時候塊地爆出黎既權利。（你收兵都要派糧啦，溝女都要早晨食左飯未做咩唔開心啦下嘛，笑喊。 ）我講咁多其實只係想帶出，我地去旅行羨慕人地呢樣個樣，冇問題，但記得諗埋點解會咁，可唔可以唔好一味淨係羨慕，可唔可以唔好淨係掛住影相打卡呃like，可唔可以花多少少時間了解多少少 。我明香港人都好忙，日日返工放工再chur多一樣興趣其實已經好攰，話唔定要進修，仲要陪屋企男女朋友等等，時間同精神都係好有限，我完全明，不過冇架，你都有義務盡力關注，起碼要對得住自己。我都明歐洲既教育同香港比真係冇得比，個個細細個開始了解社會，唔係為考試，concept同我地好唔一樣，不過冇架，要改變都係要由自己做起。
都係個句，我只係覺得，香港人係值得過得比依家好。
我唔會再講咩記得去投票呢D講到口都臭，我只係想講，我真心唔介意鑊鑊都比外國朋友問Is Hong Kong China，唔介意向佢地解釋一萬次點解Hong Kong is not China，我甚至係好想解釋得多幾次就幾次，因為我怕以後冇得再解釋，我怕以後連個No都無得講。
同埋，我發現當我去得愈多地方，我就愈鍾意香港，愈唔甘心移民。就算幾想環遊世界，想去幾多地方，我都一定會返黎。始終，呢道先係屋企。 （純粹個人諗法，原諒我1999, 我都未諗掂投邊個，但千其唔好Hea投，一齊討論下啦：））
註1: Auman段片可以睇 https://www.facebook.com/ChinglishVlogs/videos/1197711370280917/?pnref=story
